Done Bete da le lenghe sclete

Sôl cui cal à vivût...

2009-11-13T18:16:00+01:00

Sôl cui cal à vivût al mûr Vuei a mi va di fa une riflession su ce ca mi à scrit Sandro ta un post precedent; lu volti par furlan: "Spès o ai la sensazion di prossumâmi muart, ma dopo pensi e o pensi ancjemò e a mi passe, ma forsit podarès jessilu pardabon. Ven a stâi, i muarts a pensino? Temi o forsi speri di si." Su chest argoment a mi ven ta memorie un film une vore interessant, scrit da David Grieco, Vincenzo Cerami, Ottavio Jemma e Sergio Citti, autôr dal sogjet e regjist. Mortacci, chest il non dal film, vignût fûr tal '89 e, come ca si pues lei achì, a si trate di une curiose storie a episodis ambientade ta un cimitieri e l'ispirazion a jere stade date a Citti da Pasolini, mentri ca tabaiavin viazânt in machine. "Ce tantis piçulis lûs, chestis. Cheste pâs. Chescj flôrs, chest cidinôr. Al je bielissim, e noaltris o vin pôre di dut chest. Tu tu sôs muart, ancje tu tu sô muart. O sês ducj muarts. A disin co seis muarts ma sôl cui cal à vivût al mûr. Cui di voaltris al puedie dì di ve vivût?" Chestis e son lis peraulis di Edmondo, un che ancjemò al je vîf e ogni gnot a si rimpine sul mûr di spalt dal cimitieri par preà denant la tombe da la so morose e, jessint cal je un atôr, ancje se di pôc talent, al met in sene un fint suicidi. Tal cimitieri, soredut la gnot, a torzeonin lis animis dai muarts ca tabain dal trop ca i mancje par liberà i lôr spirts costrets a restà dongje dai propris vues fintremai che, tal mont dai vîfs, a sarà ancjemò cui ca si vise di lôr. E propri par chest motîf, Tommaso, che in vite al veve inventât detulis, che spes a vegnin dopradis, al je alì in cimitieri da ben 144 ains. La conclusion dal film a je che une matine un trot di int a je che spiete denant dal cimitieri sierât - il custode Domenico al jere muart dilunc la gnot - e a protestin par chel che lôr a crodin un ritart. I muarts, alore, in maniere mincjonariine ai tirin cuintri i flôrs, come a considerâju i vêrs muarts, leâts a robis terenosis cence nissun pês. Par aprofondì di plui la tematiche - a mi ere notori ca fos da ricercjâsi in Omero, Dante, Virgilio, Leopardi - o soi rivade a tirà fûr cheste interessante argomentazion di Romano Luperini. La imagjine e je cjolte sul web

Pubblicato da DoneBete | Commenti (1)

Tag: sôl cui cal à vivût al mûr

Tine Une frute ca varà...

2009-11-12T16:09:00+01:00

Tine Une frute ca varà vût si e no dodis ains a veve fat un viaç in tren da Tisane fin a Torin. Un façolet, leât insieme dai cuatri pics, la so valîs. Altris frutis a jerin za partidis prin di je. Je, a contave di ve lavorât a Venaria Reale ta la fabriche da la sede. Tal 1930, a disevot ains, a veve cjatât di lavorà a Torin, in Cors Racconigi, dolà ca jere la Cjase Mari da lis muinis di San Vincenzo, lis stessis che a Rivignan a fasevin scuele di infanzie. L'istitût di Torin al assisteve fruts che i gjenitôrs a no podevin tignîju cun se. Fruts cun gjenitôrs masse puars, o emigrâts in France, o cun situazions di malstâ in famee. Tine a lavorave alì come infermiere, chest al jere il so titul lavoratîf, parcè je a veve un bon ce fa a lavà cûi ai fruts. Tine a contave simpri di cetant gnervôs ca i fasevin lis muinis ca preparavin par se il brût di cjar e la stesse a la fasevin cuei une seconde volte par fa la mignestre da dai ai fruts. A Tine ai pareve che une simile fate di mangjarie a fos la cause da la dissenterie continue dai fruts. Lis muinis, cun tant di grumalon candit, ca metevin sôl pa l’ocasion, a si davin un gran da fa lis voltis che lis damis di caritât, ca sostignevin economichementri l’istitût, a rivavin a visità i fruts. Tine a ricuardave tra chestis la Siore Carpano, propite che da la fabriche dal licôr. Tine a jere me mari. chei piçui scaghets

Pubblicato da DoneBete | Commenti (4)

Tag: tine

Epûr no si cjatarin mai Al...

2009-11-05T16:19:00+01:00

Epûr no si cjatarin mai Al marciât a Palaçûl, Sior Vico al à comprât un par di 'savatis. Tornât a cjase a Durlasse, al prove a impirâlis: a si acuarç che une 'savate a je plui lungje di che altre e ai cole dal pît. A si vise da la femine di Gonars, sentade su di un scagnut, sot da la so barache, devant da un côl di 'savatis di dutis lis misuris, dut un sdavassum; a la viôt mentri ca sgarfe tal grum par cjatà une 'savate juste pal siò pît e ai la fa provà, dopo a torne a sgarfà e ai consegne la forsit zimule, che lui al racuei cence nancje provâle. "Forsi, cumò, - al pense Sior Vico, - un altri om al sta cjaminânt ta un altri paîs cun dôs 'savatis discompagnadis". E al viôt une ombre scarmuline çuetantte, cuissà nuie, magari pa lis calis di Maran, cun tune 'savate ca i scjampe dal pît a ogni pas, o pûr masse incjalçade, ca i scjafoie il pît intorteât. "Forsi ancje lui in chest moment a mi pense, al spere di cjatâmi par fa il scambiio. Il rapuart ca nus lee al je plui concret e clâr di gran part da lis relazions ca si stabilissin tra cristians. Epûr no si cjatarin mai". Al decît di la indenant a impirà chestis 'savatis cence pâr, un rivuart al compagn di disdete estrani, par tignì in vite chest cumbinel cussì râr, chest spieli di pas çueteantti da un paîs a un altri. A si intarde a piturâsi cheste figure, ma al sa ca je une bausie. Un sdrum di 'savatis cusidis in schirie a ven di volte in volte a cjariâ il grum da la marcjadante a Palaçûl. Insom tal grum a restaran simpri dôs 'savatis discompagnadis, ma fin tant che la marcjadante a no finirà lis scortis (e forsit a no li finirà mai, e muarte je la barache cun dutis lis 'savatis a passarà ai sies nevôts e ai nevôts dai nevôts), a bastarà cirì tal grum e a si cjatarà simpri une 'savate da zimulà a une altre 'savate. Sôl cun tun client indurmidît come lui al pues sucedi un sbalio, ma a puedin passà secui prime che il costrut di cheste falope al vadi a sdrumâsi su di un altri aventôr dal marcjât di Palaçûl. Ogni procès di roture da l'ordin dal mont al je inguaribil, ma i efiets a vegnin intanâts e ritardats dal pulvin dai grancj numars cal ten dentri mieç dal dut disconfinâts di gnovis simetriis, combinazions, compagnaments". Ma se il so erôr al nol ves fat altri che scancelà une vecje falope? Se il so straviament al fos stât bon no par fa 'savachine ma sest? "Po stâi che la marcjadante a jere babie, - al pense Sior Vico, - dantmi une 'savate par sorte e à metût in cuete une falope che da secui a stave in vuaite ta chel grumon di 'savatis, machinânt da gjenerazions tal marcjât di Palaçûl". Il maranês cencenon po stâi cal çuetàs in ta une altre epoche, la simetrie dai lôr pas a si rispuint no dome da un paîs a un altri, ma cu la lontanance di secui. No par chest, Sior Vico, a si sint mancul solidari cun lui. Al continue a çavatà a stent par da solêf a la so ombre. la conte a je voltade e messedade fasiint man basse da La pantofola spaiata di Italo Calvino Cale di Maran La imagjine e je cjolte sul web

Pubblicato da DoneBete | Commenti (11)

Tag: epûr no si cjatarin mai

Tal zardin Lis tortorelis A no...

2009-11-03T16:46:00+01:00

Tal zardin Lis tortorelis A no si viodin ben Ma a son Novembar

Pubblicato da DoneBete | Commenti (6)

Tag: lunari

Un dì e...

2009-11-02T10:48:00+01:00

Un dì e oltri. Picinin Picinin, se tu cjatis il dragon dal to estri peilu cul sintiment dal cûr. Tu viodarâs nassi zardins inmagâts e to mari a deventarà une moraresse ca ti cuvierzarà cu lis sies fueis. Fâs da lis ties mans dôs candises colombutis ca puartin pardut la pâs e in sest il pûr dal impûr. Ma prime di imparà a scrivi smondeiti te aghe dal sintiment. libare traduzion da: Un giorno, più di "un giorno". Bambino Bambino, se trovi l'aquilone della tua fantasia legalo con l'intelligenza del cuore. Vedrai sorgere giardini incantati e tua madre diventerà una pianta che ti coprirà con le sue foglie. Fa delle tue mani due bianche colombe che portino la pace ovunque e l'ordine delle cose. Ma prima di imparare a scrivere guardati nell'acqua del sentimento. Alda Merini La imagjine e je cjolte sul web

Pubblicato da DoneBete | Commenti (2)

Tag: un dì e oltri

La vuardie di un tesaur O...

2009-10-24T14:23:00+02:00

La vuardie di un tesaur O fasarai la vuaite ai scatûrs des tôs paturniis, dai messedaments che di vuei tu cjatarâs su la tô strade. Des injustiziis e dai imbrois dal to timp, dai faliments che par tô pendence tu sôs solite tirarâti dongje. Ti alçarai de soference e des tôs sbandadis di lune, dai lambics da lis tos maniis. Butarai jù i tîrs di gravitazion, il slarc e il lusôr par no fâti disflorî. E tu vuarirâs da dutis lis picagnis, parcè tu tu sôs une creature preziose, e jo, o fasarai vuardie al to ben. O torzeonavi pai cjamps dal gno Friûl (come vevio fat, no lu sai). Sôstu cence rosis cjandidis par me? Plui svelts di acuilis i miei siums a scjavacin il mâr. O ti puartarai soredut la serenitât e la calme. O fasarìn insieme la strade ca puarte ae sostance. I profums dal amôr a stramurtiràn i nestris cuarps, la bonace di Avost a no cuietarà lis nestris bramis. O tiessarai i to cjavei come tramis di un cjant. O cognòs lis leçs dal mont, e tes darai par regâl. O butarai jù i tîrs di gravitazion, il slarc e il lusôr par no fâti disflorî. Ti salvarai di ogni malincunie, parcè tu tu sôs une creature preziose e jo o varai vuardie dal to ben... Jo si, o varai vuardie dal to ben. (libare traduzion da "La Cura" di Franco Battiato) La imagjine e je cjolte sul web

Pubblicato da DoneBete | Commenti (7)

Tag: la vuardie di un tesaur

I Sants a Rivignan Ai...

2009-10-18T14:03:00+02:00

I Sants a Rivignan Ai provât a tornà cu la memorie ai timps da la me infanzie, tai ains '50, par cirì di visâmi alc dal periodi dai Sants e dai Muarts. Mi pensi che me none, me mari e mes sûrs plui grandis a mi contavin, cun grande maravee, da la fieste dai Sants di Rivignan ma jo no mi visi ca mi vedin mai puartade a viodile. Gno cusin Pieri di Durlasse a mi domandave "sôtu stade a viodi il paiazo a Rivignan?". Lui al intindeve che alì a rivavin i salts (come ca diseve me none al "circo"). Cussì al scriveve Ippolito Nievo che, achì, o ai volût voltà par furlan: "Muarts o no muarts tal doman, chê sere alì si balà di buinevoie, si che tantis voltis mi sovignì il gno Friûl, e chês nomenadis sagris di San Pauli, di Cordovât, di Rivignan dolà ca si bale, si bale tant da pierdi i sintiments e lis scarpis." Le Confessioni di Un Italiano Tal sît dal Comun di Rivignan ai cjatadis lis notiziis storichis di cheste fiere: Fiere dai Sants "Al sarès une vore dificil stabilî tropis che a son stadis fin cumò lis edizions de “Fiere dai Sants” di Rivignan. Un manifest di pôc riscuviert e publicât sul libri “Rivignano. Un sècul di vite”, al documente l’event tal lontan 1914, ripuartant, ancje, lis peraulis “L’antica annuale...”, e fasint duncje pensâ a origjinis ancjemò plui antighis. Altris notiziis a son pôc claris e, forsit, a mertaressin analisis e ricercjis plui amplis e aprofondidis che purtrop a vuê no si son mai concretizadis. Ce che al si sa, dut câs, al è che la Fiere e rapresente di simpri un apontament di impuartance fondamentâl inte vite de comunitât. Di fat, come zà memoreât, lis sôs origjinis a son lontanis tal timp, cuant che lis animis dai muarts a comparivin ai vîfs, cuant che Striis, Orcui e Cjalcjuts a jerin simpri presints te contis che i vecjos a fasevin ai fruts par passâ il timp intes lungjis seris dal invier. Di râr a rivavin ancje i viandants, che a vendevin imprescj di len o puare int che e domandave la caritât, e chescj a puartavin storiis gnovis cjapadis sù tal lôr torzeonâ: lu fasevin par disdebitâsi di un plat di mignestre. Une altre figure centrâl tes contis dai vecjos a jeris lis Aganis, o ben lis striis buinis, creaturis blancjis e irazunzibilis che a comparivin dispès parmìs dai cors di aghe. La lôr ativitât principâl e jere chê di lavâ i linçûi par dopo metiju a suiâ parmìs des gravis dai flums e tai verts prâts dongje, formant cussì une distese blancje tal stes timp sflandorose e spaventevule. La atmosfere de Fiere di Rivignan si la cjate ben interpretade intun famôs toc leterari dal secul stât. Di fat, ai 2 di Novembar dal lontan 1856 Rivignan e fo visitade di Ippolito Nievo, che vie pe sô permanence li dal Cjistiel di Frate, su consei di amîs, al rivà in paîs par partecipâ ae fieste dai dîs dai muarts, cussì origjinâl e famose di sedi za ta chê volte cognossude in dut il Friûl e oltri. La visite e fo cussì impuartante pal poete, di dedicâi un cjapitul dal so romanç storic-autobiografic “Le confessioni d’un italiano”." La imagjine e je cjolte sul web

Pubblicato da DoneBete | Commenti (3)

Tag: i sants a rivignan

Tal zardin Il ragn e la so tele Otubar

2009-10-06T16:21:18+02:00

Tal zardin Il ragn e la so tele Otubar

Pubblicato da DoneBete | Commenti (5)

Tag: lunari

L'inzen di Virna Une grande R,...

2009-09-09T07:11:00+02:00

L'inzen di Virna Une grande R, ca si viodeve sul visôr, juste cuant ca scomençave la trasmission: "Il Rischiatutto" di Mike Bongiorno. La R e un sunôr cal podeve fati saltà su la cjadree, par cetant cal jere fuart, compagn a chel dal boton ca cjalcjavin i concorents dal zûc. Ma chest sunôr e cheste sigle, ca si ingrandive e a deventave plui piçule, a vevin atrat me gnece Virna che, a chei timps, a varà vût si e no 3 ains. A veve tacât a domandà ce ca fos che robe alì e so mari ai veve rispuindût che a jere une robe ca si cjatave ancje tal siò non. Cussì a i lu veve scrit par stampatel su di un sfuei e je, alore, a veve capît che a ocoreve savè ancje ce ca fossin chês altris letaris. Al je stât cussì che Virna, cence savè a scrivi, a rivave a lei, ma letare par letare e dopo a rivave ancje a meti adun lis peraulis. A diseve: V di Virna ... R di Rischiatutto ... 1972 Virna e so agne

Pubblicato da DoneBete | Commenti (11)

Tag: l inzen di virna

Tal zardin La cise di bos Setembar

2009-09-05T09:27:11+02:00

Tal zardin La cise di bos Setembar

Pubblicato da DoneBete | Commenti (11)

Tag: lunari