Done Bete da le lenghe sclete

Epûr no si cjatarin mai Al...

DoneBete — Thu, 05 Nov 2009 16:19:00 +0100

Epûr no si cjatarin mai

Al marciât a Palaçûl, Sior Vico al à comprât un par di 'savatis. Tornât a cjase a Durlasse, al prove a impirâlis: a si acuarç che une 'savate a je plui lungje di che altre e ai cole dal pît. A si vise da la femine di Gonars, sentade su di un scagnut, sot da la so barache, devant da un côl di 'savatis di dutis lis misuris, dut un sdavassum; a la viôt mentri ca sgarfe tal grum par cjatà une 'savate juste pal siò pît e ai la fa provà, dopo a torne a sgarfà e ai consegne la forsit zimule, che lui al racuei cence nancje provâle. "Forsi, cumò, - al pense Sior Vico, - un altri om al sta cjaminânt ta un altri paîs cun dôs 'savatis discompagnadis". E al viôt une ombre scarmuline çuetantte, cuissà nuie, magari pa lis calis di Maran, cun tune 'savate ca i scjampe dal pît a ogni pas, o pûr masse incjalçade, ca i scjafoie il pît intorteât. "Forsi ancje lui in chest moment a mi pense, al spere di cjatâmi par fa il scambiio. Il rapuart ca nus lee al je plui concret e clâr di gran part da lis relazions ca si stabilissin tra cristians. Epûr no si cjatarin mai". Al decît di la indenant a impirà chestis 'savatis cence pâr, un rivuart al compagn di disdete estrani, par tignì in vite chest cumbinel cussì râr, chest spieli di pas çueteantti da un paîs a un altri. A si intarde a piturâsi cheste figure, ma al sa ca je une bausie. Un sdrum di 'savatis cusidis in schirie a ven di volte in volte a cjariâ il grum da la marcjadante a Palaçûl. Insom tal grum a restaran simpri dôs 'savatis discompagnadis, ma fin tant che la marcjadante a no finirà lis scortis (e forsit a no li finirà mai, e muarte je la barache cun dutis lis 'savatis a passarà ai sies nevôts e ai nevôts dai nevôts), a bastarà cirì tal grum e a si cjatarà simpri une 'savate da zimulà a une altre 'savate. Sôl cun tun client indurmidît come lui al pues sucedi un sbalio, ma a puedin passà secui prime che il costrut di cheste falope al vadi a sdrumâsi su di un altri aventôr dal marcjât di Palaçûl. Ogni procès di roture da l'ordin dal mont al je inguaribil, ma i efiets a vegnin intanâts e ritardats dal pulvin dai grancj numars cal ten dentri mieç dal dut disconfinâts di gnovis simetriis, combinazions, compagnaments". Ma se il so erôr al nol ves fat altri che scancelà une vecje falope? Se il so straviament al fos stât bon no par fa 'savachine ma sest? "Po stâi che la marcjadante a jere babie, - al pense Sior Vico, - dantmi une 'savate par sorte e à metût in cuete une falope che da secui a stave in vuaite ta chel grumon di 'savatis, machinânt da gjenerazions tal marcjât di Palaçûl". Il maranês cencenon po stâi cal çuetàs in ta une altre epoche, la simetrie dai lôr pas a si rispuint no dome da un paîs a un altri, ma cu la lontanance di secui. No par chest, Sior Vico, a si sint mancul solidari cun lui. Al continue a çavatà a stent par da solêf a la so ombre.

la conte a je voltade e messedade fasiint man basse da
La pantofola spaiata
di Italo Calvino

Cale di Maran
La imagjine e je cjolte sul web

Pubblicato da DoneBete | Commenti (7)

Tag: epûr no si cjatarin mai

Tal zardin Lis tortorelis A no...

DoneBete — Tue, 03 Nov 2009 16:46:00 +0100

Tal zardin
Lis tortorelis
A no si viodin ben
Ma a son
Novembar

Pubblicato da DoneBete | Commenti (6)

Tag: lunari

Un dì e...

DoneBete — Mon, 02 Nov 2009 10:48:00 +0100

Un dì e oltri.

Picinin
Picinin, se tu cjatis il dragon dal to estri
peilu cul sintiment dal cûr.
Tu viodarâs nassi zardins inmagâts
e to mari a deventarà une moraresse
ca ti cuvierzarà cu lis sies fueis.
Fâs da lis ties mans dôs candises colombutis
ca puartin pardut la pâs
e in sest il pûr dal impûr.
Ma prime di imparà a scrivi
smondeiti te aghe dal sintiment.

libare traduzion da:
Un giorno, più di "un giorno".

Bambino
Bambino, se trovi l'aquilone della tua fantasia
legalo con l'intelligenza del cuore.
Vedrai sorgere giardini incantati
e tua madre diventerà una pianta
che ti coprirà con le sue foglie.
Fa delle tue mani due bianche colombe
che portino la pace ovunque
e l'ordine delle cose.
Ma prima di imparare a scrivere
guardati nell'acqua del sentimento.

Alda Merini

La imagjine e je cjolte sul web

Pubblicato da DoneBete | Commenti (2)

Tag: un dì e oltri

La vuardie di un tesaur   O...

DoneBete — Sat, 24 Oct 2009 14:23:00 +0200

La vuardie di un tesaur

O fasarai la vuaite ai scatûrs des tôs paturniis,
dai messedaments che di vuei tu cjatarâs su la tô strade.
Des injustiziis e dai imbrois dal to timp,
dai faliments che par tô pendence tu sôs solite tirarâti dongje.
Ti alçarai de soference e des tôs sbandadis di lune,
dai lambics da lis tos maniis.
Butarai jù i tîrs di gravitazion,
il slarc e il lusôr
par no fâti disflorî.
E tu vuarirâs da dutis lis picagnis,
parcè tu tu sôs une creature preziose,
e jo, o fasarai vuardie al to ben.

O torzeonavi pai cjamps dal gno Friûl
(come vevio fat, no lu sai).
Sôstu cence rosis cjandidis par me?
Plui svelts di acuilis i miei siums
a scjavacin il mâr.

O ti puartarai soredut la serenitât e la calme.
O fasarìn insieme la strade ca puarte ae sostance.
I profums dal amôr a stramurtiràn i nestris cuarps,
la bonace di Avost a no cuietarà lis nestris bramis.
O tiessarai i to cjavei come tramis di un cjant.
O cognòs lis leçs dal mont, e tes darai par regâl.
O butarai jù i tîrs di gravitazion,
il slarc e il lusôr par no fâti disflorî.
Ti salvarai di ogni malincunie,
parcè tu tu sôs une creature preziose e jo o varai vuardie dal to ben...
Jo si, o varai vuardie dal to ben.

(libare traduzion da "La Cura" di Franco Battiato)

La imagjine e je cjolte sul web

Pubblicato da DoneBete | Commenti (7)

Tag: la vuardie di un tesaur

I Sants a Rivignan Ai...

DoneBete — Sun, 18 Oct 2009 14:03:00 +0200

I Sants a Rivignan

Ai provât a tornà cu la memorie ai timps da la me infanzie, tai ains '50, par cirì di visâmi alc dal periodi dai Sants e dai Muarts.
Mi pensi che me none, me mari e mes sûrs plui grandis a mi contavin, cun grande maravee, da la fieste dai Sants di Rivignan ma jo no mi visi ca mi vedin mai puartade a viodile.
Gno cusin Pieri di Durlasse a mi domandave "sôtu stade a viodi il paiazo a Rivignan?". Lui al intindeve che alì a rivavin i salts (come ca diseve me none al "circo").

Cussì al scriveve Ippolito Nievo che, achì, o ai volût voltà par furlan:

"Muarts o no muarts tal doman, chê sere alì si balà di buinevoie, si che tantis voltis mi sovignì il gno Friûl, e chês nomenadis sagris di San Pauli, di Cordovât, di Rivignan dolà ca si bale, si bale tant da pierdi i sintiments e lis scarpis." Le Confessioni di Un Italiano

Tal sît dal Comun di Rivignan ai cjatadis lis notiziis storichis di cheste fiere:

Fiere dai Sants

"Al sarès une vore dificil stabilî tropis che a son stadis fin cumò lis edizions de “Fiere dai Sants” di Rivignan. Un manifest di pôc riscuviert e publicât sul libri “Rivignano. Un sècul di vite”, al documente l’event tal lontan 1914, ripuartant, ancje, lis peraulis “L’antica annuale...”, e fasint duncje pensâ a origjinis ancjemò plui antighis. Altris notiziis a son pôc claris e, forsit, a mertaressin analisis e ricercjis plui amplis e aprofondidis che purtrop a vuê no si son mai concretizadis.

Ce che al si sa, dut câs, al è che la Fiere e rapresente di simpri un apontament di impuartance fondamentâl inte vite de comunitât. Di fat, come zà memoreât, lis sôs origjinis a son lontanis tal timp, cuant che lis animis dai muarts a comparivin ai vîfs, cuant che Striis, Orcui e Cjalcjuts a jerin simpri presints te contis che i vecjos a fasevin ai fruts par passâ il timp intes lungjis seris dal invier. Di râr a rivavin ancje i viandants, che a vendevin imprescj di len o puare int che e domandave la caritât, e chescj a puartavin storiis gnovis cjapadis sù tal lôr torzeonâ: lu fasevin par disdebitâsi di un plat di mignestre.

Une altre figure centrâl tes contis dai vecjos a jeris lis Aganis, o ben lis striis buinis, creaturis blancjis e irazunzibilis che a comparivin dispès parmìs dai cors di aghe. La lôr ativitât principâl e jere chê di lavâ i linçûi par dopo metiju a suiâ parmìs des gravis dai flums e tai verts prâts dongje, formant cussì une distese blancje tal stes timp sflandorose e spaventevule.

La atmosfere de Fiere di Rivignan si la cjate ben interpretade intun famôs toc leterari dal secul stât. Di fat, ai 2 di Novembar dal lontan 1856 Rivignan e fo visitade di Ippolito Nievo, che vie pe sô permanence li dal Cjistiel di Frate, su consei di amîs, al rivà in paîs par partecipâ ae fieste dai dîs dai muarts, cussì origjinâl e famose di sedi za ta chê volte cognossude in dut il Friûl e oltri. La visite e fo cussì impuartante pal poete, di dedicâi un cjapitul dal so romanç storic-autobiografic “Le confessioni d’un italiano”."

La imagjine e je cjolte sul web

Pubblicato da DoneBete | Commenti (3)

Tag: i sants a rivignan

Tal zardin Il ragn e la so tele Otubar

DoneBete — Tue, 06 Oct 2009 16:21:18 +0200

Tal zardin
Il ragn e la so tele
Otubar

Pubblicato da DoneBete | Commenti (5)

Tag: lunari

L'inzen di Virna   Une grande R,...

DoneBete — Wed, 09 Sep 2009 07:11:00 +0200

L'inzen di Virna

Une grande R, ca si viodeve sul visôr, juste cuant ca scomençave la trasmission: "Il Rischiatutto" di Mike Bongiorno.

La R e un sunôr cal podeve fati saltà su la cjadree, par cetant cal jere fuart, compagn a chel dal boton ca cjalcjavin i concorents dal zûc.

Ma chest sunôr e cheste sigle, ca si ingrandive e a deventave plui piçule, a vevin atrat me gnece Virna che, a chei timps, a varà vût si e no 3 ains.

A veve tacât a domandà ce ca fos che robe alì e so mari ai veve rispuindût che a jere une robe ca si cjatave ancje tal siò non. Cussì a i lu veve scrit par stampatel su di un sfuei e je, alore, a veve capît che a ocoreve savè ancje ce ca fossin chês altris letaris. Al je stât cussì che Virna, cence savè a scrivi, a rivave a lei, ma letare par letare e dopo a rivave ancje a meti adun lis peraulis.

A diseve: V di Virna ... R di Rischiatutto ...

1972
Virna e so agne

Pubblicato da DoneBete | Commenti (11)

Tag: l inzen di virna

Tal zardin La cise di bos Setembar

DoneBete — Sat, 05 Sep 2009 09:27:11 +0200

Tal zardin
La cise di bos
Setembar

Pubblicato da DoneBete | Commenti (11)

Tag: lunari

Lant a Messe   Al tignive i voi...

DoneBete — Sun, 30 Aug 2009 17:20:29 +0200

Lant a Messe

Al tignive i voi sieràs, il cjâf voltât viers il cîl e al predicjave a noaltris fruts, ducj robe sui vot ains. Jerin alì prime di confessâsi, figurìnsi ce robonis che vevin di vè cumbinât!
Lui, forsi un missionari, in ogni câs un predi da fûr parochie, sui 30 ains, al faseve l’elenc di ducj i nestris pecjâts, par no che no si dismenteassin nissun e, dato cal jere, al domandave ancje se si erin tocjats.
Se chest a nol fos mai sucedût prime, lui al dave juste l’imput par che lu savessin e cussì, jal lassin a contà in confession.
A mi, ancje se piçule, la robe a mi veve parût ambigue.

Gno pari a mi veve fate iscrivi a l’Azion Catoliche e cussì lavi a scoltà l’arcipredi cal tabaiave da la Madone. A lu faseve in t’un mût cal sameave in braç a l’estasi e a mi a mi dave propite fastidi.
Magari a si varà ancje acuart, parcè a mi a no mi dave nissune impuartance, mentri che invezi, a altris mes amîs, che forsi a li viodeve frutis piis, ai dave considerazion.
A cutuardis ains, propite parcè che jeri Aspirante da l’Azion Catoliche, jeri lade a fa un ritîr spirituâl al Cjastiel di Tresésin, trê diis di cidinôr e di altris noiosariis.
Si ere controladis da doi predis, un vecjo e un zovin - chest simpatic - e da altris befanatis di feminis.
Une me amie, bielissime e dal fisic plui madûr da la so etât, ca durmive ta la cjamare tacade a la me, a mi veve contât – e ancjemò a si lu vise – che dilunc la gnot ai vevin tucât ta la puarte, la vôs a jere di om, e ai diseve “apri, apri”.
Nus fevelavin dal diaul e da li sôs tentazions ma le me amie a veve ben capît cui cal jere chel vecjo diaul.

Ancje il predi cal judave l’arcipredi in parochie a mi veve fate slontanà dal la a dutrine ta l’an da la cuarte elementâr.
Lui al veve rivuart dome pai masclis, forsi li frutis ai davin fastidi, ma no par chest, su di lui, a si podevin fa malignitâts.
Al jere un patît dal balon e a si lu cjatave cal zuiave cui fruç tal biel mieç da la place. Si diseve di lui cal fasès gjespui a la svelte par la a viodi la partide tal campo.
Al jere ancje un bielissim fantat e lis feminis a si lu rimiravin ma, nancje in chest sens, a no son mai saltadis fûr cjacaris.

Ancje il plevan cal jere rivât dopo a mi veve rotis lis citis. Al faseve predicjis dolà cal dave cuintri a la zoventût. Cuant che si cjacarave cun lui al sameave ben propens a scoltâti. Dopo, però, dut al deventave pretest par scaiâlu cuintri in ta la messe da la domenie.

Cussì, a sedis ains, vevi decidût di no volè savêndi di predis e confessions. Gno pari a la pative e nol voleve scoltà nissune me rason. Al diseve che cussì a bisugnave fa, parcè cussì a nus vevin insegnât i nestris vecjos.
Par Nadâl e Pasche al varès volût puartâmi a Madone di Gracie a Udin par fami confessà dai fraris e dopo scoltà la Messe.
A Messe soi lade une volte ma par il rest mi soi simpri oponude.

Jeri aromai fantate e no savevi nancje cui cal fos il plevan da la parochie. Un dî, co stavi in profumarie e al jere jentrât un siôr, che la profumere a tratave cun tant rivuart, dopo o vevi domandât cui cal fos.
Je a jere restade imbambinide pa la me ignorance: a si tratave dal plevan in borghês.
Cualchi timp dopo, chest om, savint che gno pari al jere malât, al jere vignût a cjatâlu e cu l’ocasion vin ancje un biel poc tabaiat. Chest predi a mi a mi ere plasût une vore, colt, laureât in teologjie a Viene e, pardabon, tant simpatic.
Un om cence ipocrisiis, sclet. In ogni câs no soi tornade a messis e gjespui ma, almancul, no jeri plui rabiade cul clericam.

La imagjine e je cjolte sul web

Pubblicato da DoneBete | Commenti (5)

Tag: lant a messe

Su la comozion   Ai let che Gillo...

DoneBete — Tue, 25 Aug 2009 11:36:30 +0200

Su la comozion

Ai let che Gillo Dorfles , tal 1965, al stimave la facil comozion cetant che l'ecuivalênt dal "kitsch": "l'uomo di cattivo gusto riesce perfino a trasformare le situazioni-limite dell'esistenza: morte, nascita, sesso, patria, guerra in commoventi episodi patetici".

Sta di fat che jo no rivi a comovimi par ogni situazion. Provi un grant dolôr par chel che di mal al po sucedi ai fruts, a lis personis che no son avonde buinis di difindisi dai prepotents e mi è capitât ancje di vai par int che nancje no cognòs e di no bati cee, invezi, par altre che no mi è scognossude.

Il gno mecanisim da la comozion al meretarès, salocor, di jessi studiât.

Il dì cal je muart Claudio Capone, la vôs che conte i documentaris di “Quark”, ai vaiût dut il di e, tai diis dopo, a pene co sintivi la television o leievi di lui su internet, vie di gnûf a vaì.

Timp fa, par la maniere che aromai a si dan lis notiziis, cun rapine, cence nissun rispiet par lis personis, o ai savût che Peter Falk, il straordenari “Tenente Colombo”, al je malât di Alzheimer, ai vût un scuancàs malandret. Par la prime di viodilu sbatût in mût crudêl par television e internet come un fenomin di baracon.
Po jo sai ce ca compuarte cheste malatie e ancje lis voltis co sint a dì, a la lizere, magari par mincjonà une persone, frasis dal gjenar “io penso che i malati di Alzheimer siano più intelligenti di chi fa i programmi tv” (lete ta un blog), a mi ven une rabie imbesteade.

La imagjine e je cjolte sul web

Pubblicato da DoneBete | Commenti (2)

Tag: su la comozion

Done Bete da le lenghe sclete

Ep&ucirc;r no si cjatarin mai Al...

Tal zardin Lis tortorelis A&nbsp;no...

Un d&igrave; e...

La vuardie di un tesaur &nbsp; O...

I&nbsp;Sants a Rivignan Ai...

Tal zardin Il ragn e la so tele Otubar

L'inzen di Virna &nbsp; Une grande R,...

Tal zardin La cise di bos Setembar

Lant a Messe &nbsp; Al tignive i voi...

Su la comozion &nbsp; Ai let che Gillo...

Epûr no si cjatarin mai Al...

Tal zardin Lis tortorelis A no...

Un dì e...

La vuardie di un tesaur O...

I Sants a Rivignan Ai...

L'inzen di Virna Une grande R,...

Lant a Messe Al tignive i voi...

Su la comozion Ai let che Gillo...